Hospital Penitenciario de Carabanchel/Carabancheleko presondegia

Madrileko presondegi honetan Euskal Herriko apaiz asko egon ziren zigorturik, sermoietan giza eskubideen alde esandakoengatiko isunak ezin ordainduta edota beste kartzeletatik etorrita.

Lehenetarikoa Felipe Izagirre izan zen. Sekularizatu egin zen, beste preso politiko guztiak bezala tratatu zezaten, eta, beraz, Zamoratik Carabanchelera eraman zuten.

Zamoran mutina egin zuten apaizak ere bolada labur baterako eraman zituzten Carabanchelera: Xabier Amuriza, Paco García Salve, Jon Etxabe, Julen Kaltzada, Josu Naberan, Alberto Gabikagoxeaskoa. Garaipentzat jo zuten presoek lekualdatzea, baina pozak ez zien asko iraun, laster bidali baitzituzten berriz ere Zamorara.

1974ko uztailean, Nikola Telleria, oso gaixo, Carabanchelgo presondegi-ospitalera eraman zuten. Handik atera zenean, zigorra beteta, Sopelara bueltatu eta oso denbora tarte txikian hil zen.

Era berean, lau apaiz nafarrak izan ziren: Bernardo Maisterra, zigortuenetako bat; José María Jiménez, Miguel Andueza eta Alejandro Agirre.

Bestalde, Jesus Zubillaga hernaniarra ere bertan egon zen preso, 1975ean, hartua baitzuten agintariek Zamorara beste apaizik ez eramateko erabakia, batetik bertan zeuden apaizek egindako mutin eta gose-grebengatik eta, bestetik, Zamorako Konkordatu kartzela bera kentzea aztertzen ari zirelako.